文章日期 : 2017年3月28日

真人翻譯App 助弱聽健聽者溝通

【明報專訊】弱聽人士,尤其係用手語嘅聽障人士,喺日常生活中與人溝通時成日出現困難,有機構開發咗真人翻譯App(手機應用程式)「龍耳手譯寶」,幫助弱聽人士同健聽人士溝通,4月1號正式推出。

呢個App歡迎聽障人士、健聽人士,甚至坊間組織或商業機構使用。使用者首先要喺App上預約日期同時間,以聽障人士覆診為例,只需喺預約時間打開App,就會有手語翻譯員現身,為弱聽同健聽人士做溝通橋樑。服務時間為星期一至六,上晝9點至夜晚9點,星期日同公眾假期暫停服務。

除咗喺App度翻譯之外,開發App嘅龍耳聾人及弱聽綜合服務中心亦有提供面對面翻譯服務,多數用於見工、學生見家長、睇醫生同一啲學術事務上。中心手語翻譯員馬芬燕話,中心會員可以免費使用服務,非會員都可以註冊成為會員後免費享用,聽障人士可免費入會,會費向政府或商業機構募捐。