【明報專訊】呢排大圍經濟好差，凍薪、炒人、無薪假，梗有一個喺左近。不過有啲行業就唔同，券商就係疫市贏家之一，券商耀才早排發盈喜，除咗高層賺到笑，佢哋亦都冇忘記一班打工仔。耀才主席葉茂林囡囡葉頴恩噚日話，公司今年將會請多30人，有前線銷售人員、交易員、資訊科技人員同埋見習生。除咗逆市請人，葉頴恩話，公司人工都會拍得住大市行情，一定會高過市場2%嘅人工升幅，仲透露舊年同事平均都拎到2個月到4個月bonus，最勁一位同事，攞到30個月bonus?呀！
其實本地券商生意呢幾年唔易做，大家都慣咗玩交易App，老牌券商分分鐘畀網絡券商搶晒啲後生客。不過耀才CEO許繹彬就話，公司都有自己嘅堅持，係唔會放棄開分行，雖然最主要係搞好個App，但都唔排除會多開幾間行。咁究竟以後券商行業會變成點呢，小琴就拭目以待喇。
email:piano@mingpao.com
[小琴密語]
