【明報專訊】疫情影響唔少人生計，香港賽馬會噚日公布，推出「馬上食」網上點餐服務，協助受疫情影響而失業或就業不足嘅朋友，特別係有行動不便家庭成員或無煮食空間嘅人渡過難關。
馬會話合資格受惠者會獲得津貼，等佢哋連續8星期可以利用網上外賣平台免費訂購食品，馬會會捐助香港基督教服務處同聖雅各福群會推行服務，並透過3間企業社會責任合作伙伴，包括戶戶送、foodpanda同Uber Eats現有嘅網上外賣平台同送遞服務，為合資格者送上由當區食肆製作嘅熱食。
馬會9月推出「賽馬會逆境同行食物援助計劃」，項目包括今次嘅外賣「馬上食」服務。援助計劃由馬會撥款2.4億元成立， 為失業及就業不足，以及無接受政府綜援戶，提供過渡支援，以紓緩佢哋嘅經濟壓力同確保佢哋不愁溫飽，預計逾7萬人受惠。詳情可瀏覽網頁https://jcfoodprog.hk
