文章日期 : 2019年5月21日

有secret room facebook新辦公室港味濃

【明報專訊】香港facebook喺鰂魚涌太古坊嘅新辦公室噚日啟用,一共4層佔地6.8萬平方呎,裝修好有本土特色,例如食堂設計參考咗大牌檔同小販車,就連會議室都有「港式」名字,好似「獅子山」、「花樣年華」同「煲電話粥」。Emily仲發現辦公室內有一間「密室」,隱藏咗喺書架後面,推開書架之後,係一間有好多霓虹燈裝飾嘅秘密休息室(secret room),員工除咗可以喺入面hea,亦可以「打卡」。facebook代表同Emily講,各地分公司嘅secret room主題都唔同,香港辦公室就揀咗霓虹燈,係配合香港夜景。

張建宗大讚「模範office」

政務司長張建宗都有出席開幕禮,佢話參觀過好多辦公室,唯獨呢度令佢最難忘,係「模範office」;又大讚facebook「以員工為本」,可以令員工放鬆工作咁話。張建宗話喺辦公室行咗一轉,已經感受到facebook對員工無微不至,例如免費供應早午餐、小食,仲要係即叫即煮。佢感激facebook作為國際科企龍頭,喺香港擴大辦公室大展拳腳,係對香港創科發展「投下信心一票」,亦提供唔少工作機會畀香港後生仔投身創科行業。