文章日期 : 2019年4月25日

無懼雨夜 土力處掃描儀測量山泥傾瀉

【明報專訊】去年8月29日一場紅雨令多區水浸,其中粉錦公路近打石湖因山泥傾瀉全線封閉,多個部門全力搶修,最終趕及於9月3日開學日恢復單線雙程行車。土力工程處總土力工程師張秉業話,上年土力處引入手提激光掃描儀器,喺黑夜同降雨嘅環境下,仍可準確為塌山泥嘅山坡即時做測量工作,配合工程師嘅專業判斷,最終可以喺開學日局部解封粉錦公路。

VR模擬實景 增學員應變力

張秉業話,激光掃描喺外國並非新事物,外國執法部門會利用呢種技術掃描交通意外或罪案現場,即時鎖定證物位置,以作呈堂證供。土力處認為呢種技術可以應用喺測量工作,尤其喺黑夜都可以清晰掃描山體形狀,製作三維模型,計算山泥殘留喺斜坡上嘅體積,所以可以更快掌握災情,評估再發生山泥傾瀉時可能受影響嘅範圍,從而決定封路範圍。

除咗手提激光掃描技術,土力處上年同馬會災難防護應變教研中心合作,研發一套為培訓年輕土力工程師處理山泥傾瀉緊急事故嘅訓練方案,利用VR軟件製作仿真度高嘅模擬山泥傾瀉場景,將學員「置身」山泥傾瀉環境中,代替紙上談兵方式訓練,有學員話由於真實感提高,到現場處理山泥傾瀉事故時,應變能力會加強。

閱讀更多:測量六大專業組別 適合不同性格特質者發揮所長