文章日期 : 2019年3月15日

設計師灣仔藏城巿驚喜

【明報專訊】唔少人話香港係「石屎森林」,但好多舊區好似灣仔,依然大把特色。大家有無諗過企喺今日嘅灣仔,篤住手機「重返」舊日灣仔,睇人喺大牌檔開餐?香港設計中心喺灣仔推出「#ddHK 設計#香港地」計劃,搵咗日本設計師藤幡正樹,融合AR擴增實境技術創作40幾個作品,市民用手機App「掃一掃」區內印有「BeHere」嘅標誌,就可以見到上世紀居民生活面貌。

掃一掃BeHere標誌

AR重溫當年生活

呢個計劃又將灣仔變成「地區設計畫廊」,多名本地、海外設計師,同埋街坊一齊創作,喺區內多處塗上特色壁畫,為城市添綠意,例如灣仔柯布連道行人天橋天花有植物主題壁畫,大家行經可以抬頭望望;仲有部分灣仔電車路軌都會改油綠色,菲林明道花園仲會有大型裝置藝術。

多處塗上特色壁畫

商務及經濟發展局長邱騰華同Emily講,計劃意念係將設計融入生活,將平面同立體方式結合,重現當區歷史及民生故事,大家得閒時不妨停低腳步,城市中或者埋藏驚喜。