文章日期 : 2019年3月14日

考評局出Sticker為考生打氣

【明報專訊】今屆中學文憑試(DSE)中文科口試已經開考,繼首日試題問點樣可以鼓勵青年去捐血,噚日其中一條考題,話「廣納民意、與民同樂、訪貧問苦」係提升政治領袖民望嘅方法,要考生依成效排優次。有網民講笑話當然係畀500蚊啦,有網民話其實三樣都無用,亦有網民覺得呢條題目好值得討論。

而考評局亦因應潮流,推出12款文憑試WhatsApp Stickers(貼圖),例如「記得要準時」、「試場重地 勿拍照呃LIKE」等貼圖,請大家為身邊嘅考生打打氣。

考評局亦更新咗手機 App(HKDSE App),應屆考生只要輸入考生編號、出生日期及登記電郵,就可以查閱個人考試日程,比起舊版本要逐科查閱方便。考評局秘書長蘇國生噚日同Emily講,個App已有超過1萬人下載,但佢提醒App提供嘅日程資料只作參考,唔可以當成真嘅考試證㗎!考評局又提醒,考生一定要準時到;口試時,無論喺預備室或走廊,都唔應該用電話。