文章日期 : 2019年2月12日

參加航空業職學計劃 變身機場達人

【明報專訊】農曆新年旅遊旺季完結,唔知機場客運服務員聽旅客問咩最多?原來唔少旅客都關心行李問題。「成日有旅客以為check-in後拎番寄艙行李係輕而易舉,其實要臨時拎行李,要花1至2小時,因為行李會經輸送帶送去其他樓層做安全檢查,需時追查其位置。」客運服務員李俊曦除咗平日有好多實戰經驗,亦喺課堂學到行李輸送流程。

李俊曦參加咗職業訓練局同埋機管局香港國際航空學院合辦嘅航空業「職學計劃」,喺一間航空公司任職客運服務員,平時喺機場客運大樓返工,又要返學讀基礎課程文憑(航空),學航空貨運運作、停機坪同地勤運作等。呢個計劃畀中六畢業生報讀,學員要接受兩年培訓,學費由僱主承擔。學員每月可獲不少於8000元薪金,另加僱主津貼嘅3.08萬元「職學金」同政府發放最多4.2萬元津貼;2019學年開始,政府津貼上限會加到5.4萬元。

學員每月獲不少於8000元薪金

香港國際航空學院市務推廣及商務合作總監黎健坤話,機場第三跑道系統2024年啟用,屆時每年可處理旅客量高達9000萬人次;航空業人手需求愈來愈大,預計去到2030年,要比𠵱家多5萬人手先應付到增多嘅客運同貨運量,所以一定要培育多啲新血。