文章日期 : 2018年12月21日

環保署推天然聖誕樹回收服務

【明報專訊】相信大家近排行過商場、商廈都會見到聖誕樹,但節日一過點處置好?環保署推出天然聖誕樹回收,呼籲市民同工商機構過節後將想棄置嘅天然聖誕樹送往指定地點,承辦商會循環再用變堆肥,除咗惜物減廢,市民仲可得到電子證書同小禮物。

根據環保署資料,市民可以喺下個月4至7日,每日朝九晚六,將天然聖誕樹送去屯門環保園,或7個「綠在區區」回收點;至於工商機構就要直接送去環保園。綠在區區則只接受2米或以下嘅家居天然聖誕樹。

環保署發言人提醒,回收只適用於天然聖誕樹,運送前應將燈飾、裝飾物、膠底座等拆除,市民如要參與,記住先打電話9706 6549查詢,確保聖誕樹適合回收,以免白行一趟。