文章日期 : 2018年12月14日

行人單車「共融通道」植入啟德

【明報專訊】想放假時踩單車,喺草地野餐,睇吓維港景色,去觀塘海濱就可以一次過滿足晒3個願望。土木工程拓展署7月喺觀塘海濱公園試行「共融通道」,將長約1公里嘅行人路開放埋畀人踩單車,仲免費借單車同裝備畀市民用,仲用埋AI(人工智能)實時偵測事故,截至11月底,已有約8700人次用過。

喺觀塘海濱公園嘅「共融通道」屬試驗計劃,月底(31日)結束,不過呢個理念會用喺啟德單車徑網絡。負責啟德發展計劃嘅土木工程拓展署總工程師羅世柏話,啟德發展區會有長約13公里嘅單車徑網絡,連接區內多個景點,好似啟德車站廣場、啟德體育園、啟德河、龍津石橋保育長廊、宋皇臺公園、都會公園、跑道公園,途經觀塘避風塘兩旁嘅海濱長廊地段。

咁幾時先有得用?羅世柏話首階段長約7.5公里嘅路線,預計喺2023年同埋啟德發展區相關休憩用地、啟德體育園、啟德車站廣場等一併建成;第二階段會配合區內基建同其他發展項目,預計2025年後建成。

Article Search Box