文章日期 : 2018年11月13日

婚禮埋單平均盛惠36萬 2013年來人情價位首錄零增長

【明報專訊】有人話結婚係愛情嘅墳墓,計Emily話應該係荷包嘅墳墓。噚日生活易公布「2018年全港結婚消費調查」,發現新人結婚平均開支連續兩年回升,但婚宴人情5年來首次零加幅,更有七成新人結婚超支呀,陰功!

生活易訪問咗1116名於2018至2020年間結婚嘅新人,調查顯示喺籌備婚禮上,新人平均開支約36萬元,比舊年調查升9%。最高消費嘅項目仍然係「婚宴酒席」,每對新人平均花178,368元,升幅5%;其次為「結婚首飾及戒指」、「蜜月旅行」同埋「婚紗攝影」,四大開支合共佔新人消費87%。

七成新人結婚超支

調查仲發現七成新人結婚超支,其中約六成超支更達11%至30%。

要花咁多錢,唔少新人都希望人情可以幫補吓。但今年係自2013年以來,人情中位數首次出現零增長。無論係酒店(高級酒店1200元;一般酒店1000元)、酒樓(800元)、午宴(600元)、雞尾酒會(500元)嘅人情中位數都同去年相同。