文章日期 : 2018年9月21日

屯門共融遊樂場將開放 傷健人士齊玩彈牀

【明報專訊】唔少家長都慨嘆香港唔夠公園畀小朋友玩、設施亦唔夠多元化,政府就整咗個以「水」同「沙」做主題嘅屯門公園共融遊樂場,好快公開畀公眾用喇!呢個公園特別之處,就係用咗好多共融設計,務求令唔同小朋友都玩到,唔會因為身體上一啲限制得個望字。

發展局噚日喺facebook專頁上載短片,發展局長黃偉綸早前原來親身去到共融遊樂場睇吓呢個遊樂場設計。遊樂場有成7個遊玩主題區,分別係「光影荷花」、「山丘地帶」同「音樂感官」等,設計上亦花咗心機,例如有組滑梯係不鏽鋼製造,原因有家長話原來戴人工耳蝸嘅聽障兒童,滑塑膠滑梯時,對耳仔會唔舒服;設有小隧道同矮牆,可以畀自閉症兒童先同外界有分隔,再慢慢畀佢哋熟習環境。遊樂場亦設有傷健人士皆可玩樂嘅彈牀設施,黃偉綸就示範推住一名輪椅使用者,一齊玩彈牀。

發展局喺fb提到,幸好打風並未對設施造成損毁,目前公園做緊安全測試,開放日期有待公布。