文章日期 : 2018年9月20日

立體打印方便修復文物 古蹟辦激光掃描展睇吹「簫引鳳」

【明報專訊】點樣有效地保育及修復古蹟近年備受關注,古物古蹟辦事處(下稱古蹟辦)2016年成立三維掃描小組,小組用咗兩年幾時間,為全港24項法定古蹟同超過30項文物,以三維激光掃描技術做測繪及記錄,以立體打印技術製作實體模型,監察建築文物現狀,修復文物。

古蹟辦一級助理館長(展覽及宣傳)伍德昌話,過往只能以尺等儀器為文物古蹟作實體測量,耗費大量時間人力。古蹟辦買咗兩部坐地式同一部手提式激光掃描儀,用嶄新嘅激光掃描科技,好處係唔需要直接接觸建築物,而且連原本難以記錄嘅不規則結構或建築物屋頂數據都可以輕易獲得,單點偏差只有3毫米。

古蹟辦:盡力修復都爹利街煤氣燈

山竹襲港後,唔少市民都好關心中環都爹利街被大樹壓毁嘅幾支煤氣燈修復進度。古蹟辦土地測量師(古物古蹟)景紹岐話,呢幾日古蹟辦都有同唔同嘅專業人士商討協作,首要任務係先移除壓倒燈柱嘅大樹及欄杆,整理現場,然後再做修復工程,對於有無信心成功修復煤氣燈,景紹岐就話古蹟辦會盡力而為。

古蹟辦聽日起至12月2日,喺九龍公園文物探知館舉行《工藝與科技:三維激光掃描在文物保育和教育上的應用》展覽。

Emily去睇過,重點展品有聚星樓同尖沙嘴鐘樓嘅「點雲」數據圖像,以及上環文武廟屋脊上「吹簫引鳳」陶塑嘅3D掃描模型。