文章日期 : 2018年9月19日

150周年展覽有得睇 一個消防頭盔 換8個古董胸章

【明報專訊】今年係消防處成立150周年,消防處同康文署今日起至下月22日喺香港歷史博物館舉辦「守護同行:香港消防服務150年」展覽,首度展出唔少有價值嘅消防裝置同圖片,當中較特別嘅有6個喺1920年代使用過嘅消防胸章真品,佢哋得以從英國「回流」香港,背後多得鍾意收藏古董嘅消防隊目謝達恆穿針引線。

消防隊目網上認識英收藏家

大約半年前,謝sir喺facebook群組識咗一名英國收藏家,原來嗰位收藏家多年前從英籍嘅消防事務處前處長梅樂禮(Joseph Milner)得到呢批消防胸章,胸章經歷咗二次世界大戰,至1940年代都有使用。收藏家得知消防胸章對香港有歷史意義,好樂意分享,謝sir最後就用一個消防頭盔同佢交換咗8個消防胸章,其中6個喺今次展覽展出。

消防胸章由黃銅製成,當年係扣喺消防員制服上左胸位置,刻有唔同職銜嘅英文名,例如「HEAD FIREMAN」、「CARPENTER」(木工)、「INTERPRETER」(翻譯員)等。

翻譯員原來都有段古,謝sir話以前有華籍同英籍消防員,大家言語不通,所以有啲人係要負責翻譯。展覽亦展出另外8個胸章複製品,同各種消防歷史文物及圖片,包括早期木製嘅消防車、消防頭盔等,市民可以免費入場參觀。