文章日期 : 2018年8月31日

文化節9月開鑼 360度投影太平清醮

【明報專訊】新一屆「香港文化節」9月至下年2月期間舉行,主題係「對話.交融」,分別有展覽、研討會、音樂、電影及不同表演。其中嘅「非物質文化遺產新媒體展覽」,9月至10月喺香港大會堂展覽廳展出,透過多種新媒體技術,展示明代到晚清時期,中國東南沿岸居民抵抗天災人禍嘅方法等。市民唔止睇到武術動畫拳譜、水幕投影客家舞麒麟,展覽仲會有360度投影林村太平清醮,令人感覺如置身現場。

文化節首次同香港鼓樂節聯辦第16屆香港活力鼓令24式擂台賽,會引入獅鼓嘅組別,並參與香港中樂團嘅《港鼓飆聲》演出。電影方面,由11月至12月喺太空館演講廳,除咗可以睇港產戲,仲會探討香港精神點樣影響荷李活電影製作。另外,10月喺文化中心露天廣場仲有非物質文化遺產市集同戶外演奏會𠻹。