文章日期 : 2018年8月13日

南亞青年苦練廣東話短劇 盼社會重新認識少數族裔 除偏見

【明報專訊】話劇大家睇得多,但由南亞裔青年親自度劇本到演出「一腳踢」嘅廣東話話劇就少見喇。佢哋為咗令社會對少數族裔有新嘅認識,就算自己中文唔叻,都堅持反覆訓練咬字、音準,為觀眾準備今次以工作坊形式舉行嘅《咖喱角行動》多元文化互動劇場,令Emily相當佩服。

港大畢業生被建議做司機

樂施會「無窮世界」互動教育中心同社企WEDO GLOBAL合作,推出《咖喱角行動》多元文化互動劇場。有一班南亞青年希望分享佢哋努力訓練嘅成果,盼以短劇破除社會對南亞族群嘅偏見。兩名南亞青年擔當主角,分別係今年9月升讀大專嘅Naveed,以及大學畢業後喺WEDO GLOBAL兼職嘅Mujahida。Naveed同Emily解釋,社會標籤南亞族群,有港大畢業嘅南亞裔朋友求職時因「中文水平欠佳」被拒,仲被建議試做司機。佢哋話唔少朋友睇完短劇對佢哋多咗關心,又主動提出問題,令佢哋好感動。

從小就讀非主流學校嘅Mujahida就話,講廣東話同背中文台詞好難,中文對佢嚟講好似一幅幅圖畫符號,幸好有團隊成員幫佢逐句錄音,佢話演出「音準差少少都會鬧笑話」,要多謝大家幫手佢先可以做到。

劇場仲會送出手作體驗頭巾,由演員示範同介紹呢個Hijab服飾嘅相關文化,人人有份。接下來嘅星期日(19日)下晝2點,佢哋就會喺北角馬寶道華匯中心9樓嘅樂施會無窮世界互動教育中心演出。話劇及文化體驗收費220元,有興趣者可瀏覽樂施會網頁及網上報名。