文章日期 : 2018年8月7日

港少足赴冰島比賽偷師 健兒盼他朝晉世盃決賽周

【明報專訊】人口僅得34萬嘅冰島,早前打入世界盃決賽周,成為體壇勵志故事。由冰島、香港同北京足總合辦嘅「足球發展伙伴計劃」,聽日起至本月16日,將安排三地15歲以下(U15)少年足球隊喺冰島集訓同比賽,切磋球技。計劃噚日喺灣仔伊館舉行授旗禮,香港U15主教練朱兆基話,希望本地球員去到冰島可以開眼界,輸贏其次,最希望佢哋提升比賽心理質素。

政務司長張建宗噚日活動上用廣東話、普通話同英文致辭,大讚冰島球員憑住堅毅務實同無所畏懼嘅精神,創出歷史佳績,成為歷來晉級世界盃決賽周人口最少嘅國家,係活生生嘅「勵志篇」。佢又話希望參加計劃嘅球員喺交流團中發揮不屈不撓精神,爭取機會多同冰島青年球員同教練交流,建立友誼,汲取足球知識同經驗,並為中港足球發展努力。不過張建宗嘅普通話「非常普通」,其間台下有人都忍唔住竊竊私語。

連埋教練團,香港U15足球隊會派約30人前往冰島。司職中堅、現年14歲嘅楊憲樂形容冰島球員鬥志好強,紀律良好。同樣係14歲嘅龍門陳嘉昊,亦盛讚冰島球員永不放棄嘅精神,佢哋同聲話唔擔心當地寒冷,期待交流,更希望日後可以好似冰島咁,帶領香港晉身世界盃決賽周。