文章日期 : 2018年8月3日

香港石礦業170年歷史 建築填海材料 曾經靠晒佢

【明報專訊】香港大學研究團隊早前重塑本港石礦業歷史,發現本港石礦業原來有170年咁長歷史,20世紀初石礦業更加係發展蓬勃,全港有超過100個石礦場,不僅用作本港及外地嘅建築材料,更是填海材料來源。

逾百礦場 今日剩一

為咗解決房屋短缺問題,政府重提填海造地建屋。港大房地產及建築系兼任教授潘新華話,早於1890年中環填海工程,就用咗大量石礦場嘅石材填海,將海岸線由當時嘅德輔道中向北移至今日嘅干諾道中。到20世紀初嘅灣仔海旁填海計劃,都係利用摩利臣山石礦場嘅石塊,為早期嘅香港提供填海物料。

花崗岩曾運三藩市建屋

佢話香港石礦業已有170年,發展初期有四分之一港島人口從事有關工作;至20世紀初全港更有過百個石礦場,建築原料自給自足,甚至有能力輸出到其他地方,包括廣州、美國三藩市等,都有建築物採用香港花崗岩建成。

潘新華話目前本港採用嘅建築同填海嘅砂石原料,超過90%依靠進口;曾幾何時,「移山填海」係本港土地開拓發展歷史中一個亮點,填海嘅碎石原料以至沿岸防波堤嘅大石頭,均來自本地石礦場。佢又話本港現時只剩下屯門藍地石礦場,供應5%至10%需求,其他都係輸入內地材料,若出現天氣或交通問題,恐會令工程停工。