文章日期 : 2018年7月25日

循環再用 退役舊巴助學生生涯規劃

【明報專訊】九巴由2016年開始舉辦「舊巴士及退役巴士捐贈計劃」,延續巴士生命,捐贈退役嘅單層或雙層巴士畀非牟利機構循環再用。九巴噚日就捐出第8架畀九龍塘學校(中學部),仲係第一次捐畀中學。今次捐嘅巴士型號係丹尼士三鋒12米,下層將會重新改裝成「英語學習中心」,上層會改做「生涯規劃資源中心」畀學生訂立人生目標。

校長韓佩儀話計劃好有意義,將巴士改名做「九龍塘人動力號」(Kowloontongers’ Momentum Bus)。佢希望同學仔可以喺老師嘅帶領下,好似巴士乘客咁搵到自己人生道路嘅目的地,接受唔同挑戰。九巴就話,希望舊巴士可以幫同學追尋夢想,做好人生規劃,用另一種方式為香港人服務。