文章日期 : 2018年6月29日

有機西瓜節開鑼 黃肉「玉蘭」少甜清爽

【明報專訊】夏日熱辣辣,最啱食西瓜消暑,近年本地有機農場引入唔少新品種,令大家有機會食到「黃皮紅肉」或「綠皮黃肉」新西瓜。不過,Emily聽講本地種西瓜嘅農友今年遇到最大挑戰,唔係品類,而係要諗點樣避雨減少對收成嘅影響。

漁護署農業主任(園藝)陳益民博士噚日喺有機西瓜活動講起,6月初連場大雨,好容易浸壞西瓜啲根、令甜度下降,甚至令西瓜爆裂。種植有機西瓜嘅小牛農場負責人陳志祥話,上年冇搭「遮雨棚」,西瓜失收率去到八成,「第一水」收成只得50到60個西瓜,所以今年專登用8萬蚊整咗「遮雨棚」,令暴雨後失收率減到一至兩成,「第一水」有400個西瓜。

活動展出唔少西瓜品種,有綠皮紅肉嘅「超甜黑美人168」、黃皮紅肉嘅「黛安娜」,兩款甜度大約11至12度;綠皮黃肉嘅「玉蘭」甜度就低1度,但食落較清爽。3款西瓜喺今年本地6月同7月舉行嘅有機西瓜節都有得買,有興趣巿民可以去漁護署facebook了解。