文章日期 : 2018年6月4日

港大醫學教授攝影師出書 人體標本影集 顳骨變太空船

【明報專訊】解剖學往往予人神秘之感,香港大學生物醫學院副教授陳立基與攝影師陳的聯手,推出攝影集《探》。攝影集封面照片看似森林,實際係人體腹前壁後膜,「世界睇到嘅嘢,喺人體都睇到」,陳的以藝術手法呈現人體,帶領讀者探索人體每一個「景點」嘅奧秘。

以藝術手法探索人體「景點」

陳立基本身係骨科專科醫生,佢覺得人體結構「好靚」,後來踏上解剖學之路,佢多年前已有拍攝人體標本嘅念頭,透過朋友認識陳的,兩人一拍即合,構思製作攝影集。

陳立基習慣用正前面、正側面等角度睇標本,「最難拋下幾十年嘅科學角度睇人體,無咁容易欣賞人體漂亮嘅地方」,當學者遇上攝影師、設計師,隨即擦出火花。

「最難拋下科學角度睇人體」

攝影集封面照係腹前壁後膜標本,設計師蔡劍虹就將相片順時針轉90度,效果就好似一片森林;位於兩鬢附近嘅顳(粵音「揑」)骨被喻為「時間之骨」(因兩鬢會斑白),陳的將顳骨想像為一艘飛翔中嘅太空船,象徵時間流逝,年長就變得兩鬢斑白;盆骨作為順產嬰兒「必經之路」,陳的就將盆骨拍攝成山丘形態,有如即將爆發嘅火山口。

拍攝前失眠 「唔知點同標本溝通」

陳的用咗6日拍攝標本,佢話一開始好驚,拍攝前仲失眠咗成個月,直至「埋枱」一刻都唔知要點同曾經有血有肉嘅標本「溝通」,「梁朝偉喺電影《重慶森林》會同番梘、毛巾傾偈」,直至呢刻,陳的都係無答案。每一張相片正正反映佢當刻嘅情緒,等待讀者逐一探索。