文章日期 : 2018年6月1日

P牌導盲犬入戲院受訓

【明報專訊】UA戲院前日聯同香港導盲犬協會舉辦全港首次導盲犬戲院體驗活動,喺UA青衣城戲院實地培訓受訓緊嘅導盲犬,幫狗狗適應社區環境,等佢哋第日協助視障人士入戲院睇戲。狗狗當日要學點樣入戲院通道,帶住視障人士去買飛、行樓梯入座、離座、去廁所等,最重要嘅當然係一齊睇戲。UA院線董事總經理黃嗣輝話,嗰日見到狗狗狀態非常穩定,好快就適應長時間留喺戲院咁黑嘅環境。

狗狗寄養家庭嘅莊小姐話,受訓嘅狗狗Oscar熟習睇戲嗰陣盡量克制,乖乖瞓喺地,耐心等候完場。睇嚟佢無畀電影聲響嚇親喎!Emily仲留意到,今次活動邀請咗寄養家庭同視障人士分享同導盲犬相處嘅生活點滴、心得,加深大家對導盲犬嘅認識。