文章日期 : 2018年2月8日

住海洋公園酒店盛惠2000 標榜港人酒店 會構思優惠

【明報專訊】香港海洋公園萬豪酒店暫預計6月13日開幕,471個房間平均房價2000元,酒店大堂頗吸睛,會有個16米高、跨越3層樓嘅巨型圓柱形魚缸,不過𠵱家暫時未能接受訂房,要到貼近開幕日子先有得訂。Emily睇過6月同期香港迪士尼樂園酒店官網,最平房間價錢約2200元。

迪士尼官網 最平2200元

海洋公園萬豪酒店內部裝修緊,其總經理孔憲榮話等緊政府批入伙紙同酒店牌。佢話主題公園嘅酒店對手,係樂園中最高檔次嘅香港迪士尼樂園酒店,海洋公園優勢係交通方便,喺灣仔坐港鐵,11分鐘就到,唔使去東涌咁遠。孔憲榮又話,計劃以本地家庭客同會展客為目標,有訂酒店網反映,三成生意來自本地家庭,海洋公園酒店唔會忽視呢個數字。Emily都有問過香港迪士尼點睇,佢哋就話唔會評論。

咁有無港人優惠呢?孔憲榮話,海洋公園酒店係港人嘅酒店,未來會構思港人可享嘅優惠。海洋公園行政總裁李繩宗就話,新酒店唔只服務旅客,仲希望畀港人嚟度假,期望新酒店為公園入場人次帶來雙位數增長。

新酒店會有3座,共471間客房,當中有14間會以海洋公園公仔做主題,另外,有9個會議室同大宴會廳,以及兩個戶外宴會場地,其中有個佔地1200平方米嘅無柱宴會廳,可筵開80圍,除咗畀會展客開會,仲可以擺婚宴同開小型演唱會。孔憲榮話已經收到訂場request,但未有牌,真係唔接得。