文章日期 : 2017年11月10日

凹凸天文書 天文台人員聲音導賞 盲人觀星 用手「觸摸天空」

【明報專訊】心澄即明,唔好以為失去視力嘅人「睇唔清」,失明人士自有其方法感受世界。Emily早前碰到13歲起失明嘅莫儉榮,佢講起佢有份創辦嘅盲人觀星營,今年已經去到第8屆,聽日同後日喺上水舉行,一屆比一屆人多,約有2200人參與;今屆更新增家庭營,鼓勵傷殘家長帶健全孩子參與。

新增家庭營 鼓勵傷健參與

莫儉榮跟Emily講起,8年前受到朋友鼓勵「失明不等於失去視野」,只要願意,都可以克服困難欣賞大自然,於是同一班志同道合者籌辦首屆盲人觀星營。佢回想當年不被看好,有網民恥笑「盲人點睇星」,莫儉榮其實唔介意一般人諗法,因為佢哋始終唔太理解失明者,反而係當年好多失明者都唔睇好,覺得「盲人無可能睇到星」,但佢堅持,結果活動成功,唔少失明者喺鼓勵下作嘗試,超越自己;另外又獲有心人協助,如特別訂購專供盲人觸摸嘅凹凸天文圖畫書同一啲行星嘅模型,更有天文台嘅專業人員提供聲音導賞,畀視障者用手「觸摸天空」。

曾被笑「盲人點睇星」

除咗本地失明者,內地失明者都有來港參加,其中朱閔已是第5次參與,佢同Emily講,話覺得活動令佢感覺被接納,亦變得開朗。

其他傷殘人士亦有參與,好似坐輪椅嘅溫錦輝,佢過往會認為到郊外觀星好艱難,而活動有義工協助,喺觀星前幫手清理營地沙石及牛糞,方便佢哋以輪椅出入,過往鍾意拍攝人像嘅佢,喺活動中認識好多攝影發燒友,更從佢哋身上學懂風景攝影,至今年已經係第4次參與觀星活動喇。