文章日期 : 2018年6月8日

浸大生治癒短片奪動畫獎

【明報專訊】一套故事溫暖嘅動畫可以安撫人心,浸會大學傳理學院電影學院動畫及媒體藝術嘅學生,創作咗一套關於文職少女同大熊嘅動畫,拎咗第五屆24格.創意媒體嘉年華最佳動畫片獎。

24格.創意媒體嘉年華由北京師範大學—香港浸會大學聯合國際學院主辦,4個得獎學生譚樂涵、姜丁元、鄭婉雪及楊怡然今年讀三年班,佢哋嘅作品叫《Bear Me in Mind》。故事講一個平凡嘅文職少女,捱完一個黑仔嘅工作日之後忍唔住喺巴士上喊咗出嚟,咁啱遇到一隻外形得意嘅大熊,一齊展開奇妙旅程。

導演譚樂涵話都市生活忙碌,令人好似唔識開心咁,所以希望製作溫暖又治療嘅動畫短片,為觀眾帶嚟歡樂。佢話由於一定要逐格繪製,用足成年製作,拎到獎係對佢哋努力嘅肯定。

Article Search Box