文章日期 : 2018年6月5日

畫埋圖 幼園生爭取水上樂園 中西區議員﹕將約晤當面解釋

【明報專訊】18區區議會先後提出社區重點工程項目,好似銅鑼灣摩頓台建社區中心同觀塘建噴水池,目前仍待立法會批出撥款,原來小朋友都好關心自己生活嘅社區,好似西營盤救恩學校幼稚園部讀書嘅小朋友,就寫信畀中西區區議會副主席陳學鋒,表達佢哋希望喺該區興建水上樂園嘅建議,除咗寫字之外,仲畫埋「設計圖」畀區議員,非常可愛。

陳學鋒噚日喺facebook上載小朋友寄畀佢嘅信,上面寫有「我們的計劃書:海濱長廊空置用地」,信中話「我們發現香港沒有真正的水上樂園」,知道海濱長廊有空置用地,所以希望議員幫佢哋同政府爭取一下,信中更附有6幅畫,話係佢哋對水上樂園嘅設計圖。

建議唔可行 需淺白解畫

陳學鋒同Emily講,今次係第一次收到小朋友嘅信,相信部分同區嘅議員都收到,形容「好耐無收過咁靚嘅信」,助理更提佢一定要親手寫回信,佢坦言都要仔細諗諗點寫,因為興建水上樂園唔可行,但都要用淺白方式同佢哋講。陳學鋒話,會安排親自同呢班小朋友見面當面解釋咁話。

Article Search Box