文章日期 : 2018年5月9日

長者導賞講社區野史 分享兒時生活

【明報專訊】油麻地廟街一帶,入夜後有唔同攤販擺檔賣紀念品,原來喺幾十年前,有人會擺攤幫人睇牙同剝牙,仲會用中藥做「麻醉劑」𠻹,呢啲社區小故事,全部都係77歲嘅彭華記親身經歷。彭華記喺社會企業「歲閱悠遊」擔任社區導賞員,帶領團友穿梭油麻地大街小巷,講社區歷史故事,佢話自己代表香港基層,好開心可以將1950、60年代嘅兒時生活分享畀下一代。行程個多小時,途經俗稱紅磚屋嘅水務署舊抽水站、油麻地戲院及榕樹頭等。

擬培訓認知障礙患者當導賞員

「歲閱悠遊」係一班大學生喺2016年成立嘅社會企業,主要招募長者喺唔同地區辦導賞團,等市民同遊客了解香港昔日社區故事同上一輩嘅生活經歷。除咗油麻地,導賞團亦遍佈石硤尾、慈雲山等,長者導賞員有份訂定路線,團費由團友自行決定,導賞員就會收取時薪逾百元。參加者林小玲讚揚彭華記描述豐富,「佢講述好多小人物嘅生活,住喺邊、賣乜嘢,好仔細、好有趣」。

「歲閱悠遊」創辦人之一郭爾鈴話,長者帶領導賞團,除咗可以促進社會跨代溝通,仲可為長者提供就業機會,未來會同社福機構合作,培訓認知障礙症患者成為導賞員,將會以香港仔華富邨作為試點。有興趣參加導賞團嘅朋友可以上網報名(eldertrekshk.com)。