文章日期 : 2018年5月7日

生命攝影師幫基層影全家福

【明報專訊】母親節快到,大家諗好點同媽媽慶祝未?有生命攝影師噚日就義務幫基層家庭影相,提早送禮物畀基層媽媽。

生命攝影重互動 捕捉真摯反應

Emily同大家一樣都未聽過生命攝影,於是就請教咗生命攝影師馬嘉健。佢話,生命攝影同一般攝影相比,唔太講求專業器材、燈光同攝影技巧,而係注重人與人之間嘅日常互動,捕捉人最真摯嘅反應。馬嘉健話,仔女長大後往往會不經意將父母擺埋一邊,而透過生命攝影可以重新連結家庭關係。

明德社區主任陳志豪噚日就邀請到馬嘉健為區內嘅基層家庭影相。陳志豪話,基層市民好少有機會請專業人士影全家福,趁住母親節就到,希望市民可以體會生命攝影,留個美好回憶。李太一家影完相都好開心,佢話小朋友大得快,希望把握今次機會影多啲靚相,老咗就可以睇番。李小朋友就話,平時唔會錫爸爸,但影相時就錫咗一啖,覺得同爸爸嘅關係更上一層樓呀。