文章日期 : 2018年4月27日

朝鮮食品來港參展 有人參同即食麵

【明報專訊】韓國燒烤、泡菜、醬油蟹呢啲韓國(南韓)食品好受香港人歡迎,朝鮮民主主義人民共和國又有咩好食呢?各位吃貨,機會嚟喇,朝鮮將於6月首度來港參加國際展覽,仲打算帶即食麵、麵包同埋人參產品等參展。Emily最想試吓朝鮮即食麵,咁就可以同韓國嘅辛辣麵一較高下。

朝鮮喺香港嘅全球貿易伙伴中排180位,兩地貿易額非常小,今次香港亞洲國際博覽館喺6月27至29日舉辦首屆「香港一帶一路國際食品展」,可以打開朝鮮美食嘅神秘面紗。據朝鮮駐港總領事館,朝鮮會派出兩間具代表性嘅貿易公司,分別係「朝鮮高麗貿易總公司清流對外物資交流社」及「朝鮮明信貿易總會社」。

派廚師參加一帶一路烹飪賽

佢哋會有8個展位,夾埋展出幾十種產品,包括即食麵、麵包、餅乾、玉米、綠色有機食品、海產品(海參、海帶、魷魚乾、海貝、海螺等)、加工食品、農產品、人參產品(紅參、參茶、人參蜜果、人參精華、人參飲料、人參酒、紅參切片、人參精、人參湯、女士專用補藥、人參蜂蜜)等。朝鮮團仲會派出廚師一顯身手,參加「一帶一路國際美食烹飪大賽」。