文章日期 : 2018年4月27日

史蹟徑更新 少年孫中山現身 藝術品設QR Code 一掃知歷史

【明報專訊】去到上環歌賦街,轉入城皇街斜路,旁邊係聖公會基恩小學,即係中央書院(皇仁書院前身)嘅原址,唔知大家經過有無諗起,少年孫中山可能日日行呢條路返學?

呢條街𠵱家多咗道紅色拱門,學校對面石牆下,有一個木面同鏡面嘅柱形藝術品,全部同孫中山經歷有關,係孫中山史蹟徑更新計劃嘅藝術作品。旅遊事務專員黃智祖噚日出席計劃開幕禮,提到史蹟徑喺上環有16個紀念牌,介紹孫中山喺香港讀書同革命嘅足印,今時今日用紀念牌介紹似乎太悶,於是3年前就邀請9個本地藝術家,喺呢16個史蹟點製作藝術品,用藝術講歷史,希望激發大家對歷史嘅好奇心。

前面提到嘅紅色拱門,原來係重現第一代中央書院校門,藝術家兼策展人之一朱國勇話,去香港歷史檔案館搵到書院圖則,設計出呢個作品,等遊客想像孫中山每日返學嘅場景。另一策展人謝錦榮話,中央書院原址係歌賦街,佢嘅作品一面係木面、一面係鏡面,木面雕咗皇仁書院校刊《黃龍報》封面,鏡面嗰邊就會見到十七八歲孫中山學生時代「返學look」。

黃智祖同Emily講,成個項目用咗900幾萬元,每個史蹟點藝術品都有二維碼QR Code,遊客掃一掃可以去到史蹟徑官網,裏面會講解藝術品意念同孫中山歷史,仲有語音導航,方便大家邊行邊聽。