文章日期 : 2018年4月10日

明年起可赴荷蘭工作假期

【明報專訊】近年愈來愈流行工作假期(working holiday),唔少香港年輕人一邊打工,一邊感受異地生活,荷蘭噚日就同香港簽署諒解備忘錄,設立雙邊工作假期計劃,成為第13個同香港簽訂工作假期嘅地區。計劃明年1月1日開始生效,兩地每年各提供100個名額,有興趣者(18至30歲)唔好錯過喇。

兩地每年各供100名額

政務司長張建宗噚日同荷蘭王國首相馬克‧呂特會面,其間見證勞工及福利局長羅致光(CK)同埋荷蘭駐香港總領事呂安微簽訂諒解備忘錄,兩地青年人日後就可以透過計劃申請簽證,喺荷蘭或香港逗留最多1年,到時可以打工掙取旅費,或者修讀短期課程。CK話計劃除咗可以擴闊視野,畀兩地青年喺外地文化下獲取生活及工作經驗,亦加強香港同荷蘭嘅雙邊關係。

香港自2001年起先後同澳洲、新西蘭、德國、英國、日本、加拿大、韓國、法國、愛爾蘭、奧地利、匈牙利、瑞典等12個國家訂立工作假期計劃,至今已經有超過8.5萬名個港青參加。