文章日期 : 2018年3月28日

消防煙火特遣隊換上「火紅戰衣」

【明報專訊】「黃金戰衣」相信市民都非常熟悉,原來消防有特別組別已全面用緊「火紅戰衣」。消防處最新一期《精英專訊》介紹,煙火特遣隊已全面使用紅色滅火防護服,有需要時奉召到場。「火紅戰衣」沿用「黃金戰衣-PBI Matrix構築物滅火防護服」嘅相同物料,只係顏色唔同,再配上原有嘅橙色頭盔,等前線人員容易識別。

設大碼抬牀 最高承載850磅

據Emily了解,煙火特遣隊一般只會喺三級或以上樓宇火警或有需要時,協助現場主管評估火場環境及火勢發展,有需要時亦會參與救火工作,2015年慈雲山車房大爆炸、2016年迷你倉四級大火,煙火特遣隊亦奉召到場參與救火。

另一方面,救護抬牀方面,消防近年喺9個行動單位推行先導計劃,引入適合體型龐大病人嘅新型抬牀,最高承重量高達850磅,闊度同最大負重量明顯增加,仲可以配合脊椎板、抬牀墊使用,除咗可以為體型龐大人士提供安全服務,仲可以保障救援人員嘅職業安全!