文章日期 : 2018年2月9日

飯盒供應商聯絡「食德好」 停課不做大嘥鬼 逾萬飯盒贈社區

【明報專訊】政府因應流感疫情,前日無預告下宣布幼稚園、幼兒中心同小學等提早放新年假,令唔少人措手不及,包括家長及為學校提供飯盒嘅供應商。食物回收組織「食德好」呢兩日獲供應商接觸,從供應商回收咗因停課而無人接收嘅1.4萬個飯盒,透過社福機構同各區議員辦事處轉贈,既避免浪費,又幫到有需要嘅人,一舉兩得。

民主黨鴨脷洲邨社區主任嚴駿豪噚日喺辦事處幫手派發飯盒,並喺facebook貼文叫有需要人士領取。佢同Emily講,「食德好」透過社福機構向佢辦事處轉贈200幾個飯盒,辦事處噚日下晝半個鐘內就派晒所有飯盒,領取嘅街坊以長者為主,排隊嘅人一度打蛇餅。

「食德好」亦喺fb貼相,圖中見到義工轉贈飯盒,機構同時呼籲大家要「惜食」、「唔做大嘥鬼」。