文章日期 : 2018年2月2日

曾任鋼琴調音師 港唯一女釘甲匠:釘馬蹄挑戰更大

【明報專訊】全港約有40名釘甲匠,區家雯(Carman)係現時唯一女將,曾經做過鋼琴調音師,佢話調琴需要了解鋼琴運作,釘甲就要清楚馬嘅性格,「鋼琴係死物,馬匹係動物,要即時應變,挑戰更大」,希望用自己嘅手藝為馬打造最舒適嘅鞋。

馬踏馬蹄鐵,同人著鞋嘅道理一樣。馬走入釘甲房,Carman就上前摸摸馬背,將馬蹄提起、用兩腿夾住,俯身用鐵鉗將鐵蹄甲上嘅釘拔走,U形嘅馬蹄鐵就可以除低。

Carman將蹄鐵放入1000℃嘅高溫熔爐,再用大鐵錘敲打蹄鐵成為適合馬蹄嘅形狀,滾燙燙嘅蹄鐵套上馬蹄,即時冒起濃煙,佢再用釘錘將蹄鐵釘穩,然後做最後修剪就完成喇!隻馬舒適咁走動幾步,就好似人著上合適嘅鞋一樣。

全港約有40名釘甲匠,其中9個負責管理馬術嘅馬,Carman係其中一員,每個釘甲匠管理約60匹馬,每日為3至4匹馬換甲。

Carman話每隻馬都有個性,要根據腳蹄形狀或者蹄上傷口釘蹄鐵,同做鋼琴調音師一樣,根據每部鋼琴嘅結構同特性調校,而馬就更有挑戰性,亦要即時應變。

打鐵靠臂力每周健身兩三日

Carman又話,初時會「打到手軟」,𠵱家每周要兩至三日做個半鐘健身,練好臂力同體力。佢笑住話,體重曾經有成180磅,入馬會工作時都有160磅,𠵱家比起高峰期減咗近40磅,佢打鐵時都好有力。