文章日期 : 2018年1月25日

80後渠務工程師 當和事老處理投訴

【明報專訊】「80後」渠務署顧問工程管理部工程師方偉鵬(Andy),係渠務署少數有法律背景嘅工程師,除咗參與工程設計、監測施工等,仲擔當政府、工程公司同市民之間嘅「和事老」。佢試過收到村民投訴,話反對上午施工,最後發現原來投訴人嘅老婆臨盆在即,只係希望佢可以休息多啲。雖然團隊已按照法例申請施工,但最後喺無影響整體工程進度下,都決定將嗰部分工程延至後期。佢話除咗思考點樣令工程符合法律框架,亦要體諒市民需要,搵創意方法解決。

為孕婦延後部分工程

Andy以前修讀土木工程,投身社會後再兼讀法學士學位同法學專業證書課程(PCLL)。佢已加入渠務署兩年,主力負責鄉村污水渠等工程。佢喺大埔泰亨鄉處理污水渠工程時,村民擔心工程影響村內一棵十幾米高嘅「風水樹」,最後團隊決定修改走線,令工程距離棵樹5至6米。為咗令村民安心,佢哋仲定期探測棵樹嘅狀况。

泰亨鄉屋與屋之間嘅行人通道狹窄,Andy話因為唔少村民出入,施工亦要特別小心。施工前佢哋會實地考察,諮詢村民同區議員意見。