文章日期 : 2018年1月22日

污水廠綠化 一舉多得

【明報專訊】除咗公園外,有無諗過渠道同污水廠都可以綠化?為咗測試邊啲植物適合喺渠務設施上種植,渠務署2014年起喺小蠔灣設立近2000平方米嘅植物苗圃,培植50多種本港原生植物,令渠務設施綠意盎然。

渠務署園境師許樂謙話,原生植物對生態有更多益處,有咗小蠔灣苗圃,正好研究合適品種同所需環境。佢話咁多植物品種中,初步選定嶺南山竹子、梭羅樹、青葙、薏苡4種植物,移植喺渠務設施上。

佢解釋,嶺南山竹子係原生常綠喬木,果實係野生獼猴主要食糧;梭羅樹有香味,吸引蝴蝶同蜜蜂飛來採蜜;青葙形態呈串形,係一種優美嘅頑強植物,即使土壤不佳亦能生長;薏苡則有淨化污水中氮和磷嘅作用。當中青葙、薏苡適合喺河道栽種,目前遍植於萬屋邊同九龍坑河道;梭羅樹、嶺南山竹子則適合渠務設施,青衣同昂坪污水處理廠已經採用。

另一園境師唐翠珊話,佔地28公頃嘅沙田污水處理廠,三成面積用作園境綠化,包括綠化天台同垂直綠化,署方喺污泥儲存缸上種植,吸引雀鳥昆蟲前來棲息覓食。署方呢個星期六及日喺沙田污水處理廠舉行開放日,免費畀公眾參觀。