文章日期 : 2018年1月11日

土產受訓導盲犬導師 首人獲證書

【明報專訊】香港近年引入導盲犬,但仍欠缺訓練人才,香港導盲犬服務中心噚日有喜訊,話終於有首名喺香港接受培訓並獲確認資格嘅導盲犬導師,佢就係愛犬之人李苑甄(Edith)。Edith噚晚獲中心頒發畢業證書,確認其專業資格。

Edith話,佢最初接觸導盲犬,只係做義務嘅導盲犬寄養家庭,之後有機會接受正規訓練,成為訓練員,至今通過考核,晉升為導盲犬導師,仲計劃全職去做。

服務中心話,以往要考取同樣資格,要去海外相關機構通過考核確認,而香港首次可評核導師資格,話係導盲犬本土化新里程。中心話佢哋目前有43隻導盲犬, 75%為本土繁殖,較成立時只有兩頭由外國捐贈嘅幼犬,情况大大改善。

佢哋噚晚搞成立6周年慶祝活動,食衛局前局長高永文接受委任,成為該中心首名首席榮譽贊助人,民建聯議員陳克勤等嘉賓都出席支持。

鄺俊宇爭受訓導盲犬入食肆

另外,民主黨立法會議員鄺俊宇去信食衛局,話要為受訓導盲犬爭取權利。佢話法例規定,受訓中嘅導盲犬不屬於失明人嘅嚮導,故在現行法例上,受訓犬唔能夠獲得豁免帶入食肆。佢認為當局應更新條例,等受訓犬都可以入食肆等,以熟習環境。