文章日期 : 2017年12月22日

20港鐵站設哺乳間 媽媽大讚

【明報專訊】唔少商場近年都增設母乳餵哺設施,方便餵哺人奶嘅媽媽使用。專門提供列車服務消息嘅港鐵非官方facebook專頁「MTR Service Update」公布,噚日開始港鐵20個車站嘅哺乳間正式啟用,當中唔少係轉線站,包括油麻地、旺角、太子、九龍塘、中環、金鐘、尖沙嘴、美孚、荔景、北角、鰂魚涌、油塘、調景嶺、香港、九龍、南昌、青衣、欣澳、紅磡同大圍站。

其他站亦可安排房間

哺乳間會有屏風、枱櫈、消毒啫喱同廢紙箱,仲會提供獨立冷氣。港鐵回覆話,有需要嘅乘客可以聯絡站內職員,就可以安排使用哺乳間;至於其他未有哺乳間嘅車站,職員亦都會為有需要嘅乘客安排房間。唔少媽媽都喺fb大讚今次港鐵嘅安排,希望未來可以有更多車站設有哺乳間。

另外,港鐵早前為觀塘線、荃灣線、港島線同將軍澳線,向內地中車青島四方機車車輛股份有限公司訂購咗93列8卡嘅全新列車,首列新車已經喺青島完成組裝同測試,噚日喺當地舉行慶祝儀式。港鐵介紹,新列車配備多項新設備,包括採用新一代照明系統、動態路線圖,同埋改用環形扶手。