文章日期 : 2017年12月19日

參考沙田畫舫 知專學生茶館設計奪獎

【明報專訊】香港學生憑創意喺國際設計比賽獲佳績,香港知專設計學院(HKDI)室內設計高級文憑畢業生朱家穎,憑作品「靜音茶館」,奪得由香港室內設計協會舉辦嘅「第25屆亞太區室內設計大獎」學生組金獎,擊敗咗來自香港、日本、新加坡同馬來西亞等地約100份參賽作品。

朱家穎設計嘅茶館,以沙田城門河畔嘅畫舫為藍本,加入日式茶座風格,強調要用自然光,加入仿製嘅樹葉聲及流水聲,令置身其中嘅都市人好似去咗郊外,心靈得以安靜。

另外,HKDI室內設計高級文憑畢業生陳銳檳、張澄匡及譚君瑤喺「亞洲建+設大獎2017」各自獲得學生室內設計組卓越獎。佢哋嘅作品都係以鞏固香港作為亞洲設計之都嘅地位為目標。同一比賽中,該校產品設計高級文憑畢業生霍賜健及何永亨,喺學生產品設計組獲得卓越獎,霍賜健嘅設計係可以好似風琴咁樣壓縮收納嘅嬰兒奶樽套裝,令父母帶BB出街時更方便;何永亨嘅設計就係適合狗用嘅特製跑步機,等主人同愛犬可以無懼風雨,隨時喺室內一齊做運動。