文章日期 : 2017年12月12日

建築雙城雙年展 「蝦餃麻將」介紹城市執生

【明報專訊】香港建築師學會雙年展基金主辦嘅「港深城市\建築雙城雙年展(香港)」今日開始,直至明年2月11日,今年以「城市執生︰留得青山在的傳奇」做主題,介紹香港建築、城市設計嘅「執生」智慧,並且第一次有跨地區展館,喺9個地方做展覽,包括中環站J出口、中環街市、海港政府大樓橋底、銅鑼灣希慎廣場等。

主辦單位噚日搞傳媒預覽團,Emily都有去,發現唔少展品充滿地道元素,中環站J出口展出有香港元素嘅麻將,筒子變咗菠蘿包、蝦餃燒賣等地道食物,萬子就變咗做新蒲崗嘅街名,好似「四美」、「五芳」等。海港政府大樓橋底嘅空地做城市農耕,同本地有機農夫合作,參與市民可以種油麥菜、番茄等蔬菜,預計明年1月有第一批收成。

至於希慎廣場,設計團隊利用廣場嘅跨樓層自動扶梯空間作為展覽場地,用摺紙方式造一比一大小嘅摺櫈,並將大量「摺櫈」堆起嚟,成為「櫈紙牆」,設計團隊希望可以反映「執生」嘅定義在於彈性同靈活。

Article Search Box