文章日期 : 2017年12月8日

橋牌港隊亞洲賽奪金摘銅 爭取出戰亞運

【明報專訊】明年喺印尼首都雅加達舉行嘅亞運會,將新增橋牌項目。18名橋牌港隊成員上月遠赴印尼參加亞運預備賽,最終獲得一金兩銅佳績。港隊黎偉傑同麥國輝喺男雙奪冠,男女子混合隊同女子隊拎到銅牌。

黎偉傑(Dicky)同Emily講,預備賽就好似明年亞運嘅前哨戰,能夠奪冠特別有意義,佢仲話以前都有喺其他國際比賽拎獎,不過今次頒獎嗰陣,見到香港區旗顯示喺熒幕上,仲聽到會場奏起國歌,特別感觸,好似為香港爭取到榮耀咁。

Dicky話佢哋其實由年前就開始訓練,仲專程搵咗嚟自內地和台灣嘅專業教練指導,女子隊過往喺國際賽中,都係拎第8名左右,今次攞到第3名係一大進步。不過呢,佢哋出年係咪真係可以代表香港出賽仲係未知之數,因為香港奧委會未決定係咪派隊參加亞運嘅橋牌項目,好似要再睇吓成績喎。