文章日期 : 2017年12月5日

雙子座流星雨 14號凌晨睇最佳 每小時料20至30粒

【明報專訊】被太空館譽為全年最值得欣賞嘅雙子座流星雨,由噚日至17號睇得最清楚,而12月14號零時0分至清晨5點係香港最佳觀賞時間。港大「夜空光度監測網絡」就提供觀星貼士,項目研究主任潘振聲話,肉眼睇到嘅流星數量受唔同因素影響,例如地理位置同雲量,而因為光污染等影響,預料每小時大概可以睇到20至30粒。

推薦西貢天文公園大嶼山南

Emily問邊度睇流星雨比較好,潘振聲話視野比較廣闊同黑暗嘅郊區,例如西貢天文公園同大嶼山南等。早排有預測話一個鐘最多可以睇到120粒,潘振聲指嗰個只係「理想化」嘅數目,香港根本無可能出現呢個情况,因為今次流星雨嘅預測高峰期係香港嘅日頭時間,加上個輻射點唔喺天頂位,就算香港無光污染,每小時最多都係睇到70粒流星。

雙子座流星雨係主要流星雨之一,輻射點位於雙子座,流星體源自3200號小行星法厄同(Phaethon)。網絡項目經理蘇柱榮提醒,到時唔好用強光或閃光燈照明,宜轉用紅光電筒,只要環境夠暗,就應該睇到流星。

忌用閃光燈 可用紅光電筒

佢話市區光污染太勁,無可能睇到流星,而香港光污染嚴重,普遍地區可以睇到嘅流星數目大減過半,市區更減少達九成。如果想欣賞到大自然嘅美態,記得保持公德心同環保啲。

港大整咗個觀星懶人包,教大家觀星基本知識,有興趣可以瀏覽網址(nightsky.physics.hku.hk/KE/201718/infographic)。