文章日期 : 2017年11月29日

80周年開放日 理大免費驗眼驗脊骨

【明報專訊】香港理工大學今年踏入80周年,為咗與民同樂,將會喺嚟緊嘅周六、周日舉辦開放日,仲有600幾人嘅單車隊喺油尖旺區踩單車巡遊;理大仲會開放校內平時鮮為人知嘅實驗室,並有免費驗眼、驗脊骨等。

理大自1994年升格為大學之後,至今冇舉辦過開放日,以往只搞一年一次嘅,係畀中學生揀科用嘅資訊日(Info Day),所以今次開放日可以話係闊別咗23年!該校副校長阮曾媛琪話,開放日主要係展示大學唔同範疇嘅科研成果,例如為中俄合作展開探測火星任務而設計嘅行星表土準備系統、火星岩芯取樣器,供鐵路用嘅光學傳感鐵路監測網等,仲會開放航空服務研究中心、3D打印實驗室、消聲室等,希望可以引起小朋友對科研嘅興趣。

理大周日仲會舉行「8×80單車樂」,由8隊、每隊80名理大成員穿越油尖旺,展示理大精神同道路安全,屆時會由警車開路,參加者事先亦經過評核,確保體格良好同識踩單車。

理大對於市民嚟講,較出名嘅莫過於驗眼。兩日開放日共有150個免費驗眼名額;同時原價1000元一次嘅超聲脊柱側彎評估亦會免費,名額同為150個,有興趣就快啲上網登記喇。

網址:www.polyu.edu.hk/tc/openday