文章日期 : 2017年11月24日

「減壓狗狗」港大圖書館候命 試行3日 下月考試期可預約見面

【明報專訊】有無諗過大學圖書館會有狗狗呢?香港大學喺12月11日開始推出駐館治療犬試驗計劃。呢隻治療犬係港大於救狗之家(Hong Kong Dog Rescue)領養嘅英國古代牧羊犬,今年9歲。佢中文名叫熊貓,唔知係咪因為佢嘅毛色同熊貓差唔多呢,不過Emily就唔知點解佢嘅英文名叫Jasper喇。

牧羊犬Jasper 來自救狗之家

呢個試驗計劃為期3日,分別喺12月11日、13日同15日舉辦,半個鐘為一節,3節時段為上午9點半、下晝1點半同兩點半,學生及教職員要先預約,跟住喺港大百周年校園嘅呂志和法律圖書館同Jasper見面。

港大話,唔少研究顯示動物輔助治療有助放鬆同改善身心健康,世界各地有好多大專院校、圖書館、大學保健處同學生輔導中心引入治療犬幫助學生紓壓,而佢哋就係希望Jasper可以令學生喺12月考試期間放鬆吓自己,紓緩學業壓力同焦慮情緒。港大圖書館館長蘇德毅(Peter Sidorko)話好開心大學有自己嘅駐館治療犬作為「療癒吉祥物」,幫到學生投入學習。