文章日期 : 2017年11月22日

香港寬頻福利留人才

【明報專訊】早兩日政府公布香港最新失業率降至3%嘅近廿年低位,其實各行各業都話請人難,咁請到員工後點樣可以令佢哋長期留喺公司打拼,亦都唔係易事。小琴就覺得,用良心挽留人才方為上策,好似香港寬頻(1310)噚日宣布,本月起員工因工受傷,首3個月工傷病假會以全薪計算,3個月之後則依照法例計算,而現行法例要求,員工首3個月工傷病假,僱主其實只需要支付五分之四嘅月薪。

香港寬頻高級經理——人才管理黃潔儀就話,公司無論喺人才福利及保障方面,均致力高出法例嘅最低要求,相信有關措施可以有效提升同事嘅工作幹勁同滿足感,從而成為公司增長動力。其實香港寬頻喺善待員工方面係行得幾前,包括女士有16個禮拜產假,男士都享有兩個禮拜侍產假,入職月份又可以放一日入職周年假,而早幾個月公布話為剛成為祖父母嘅員工提供3日「添孫假」更加引起熱話,小琴真心希望呢股風氣快啲吹去其他公司啦!

email: piano@mingpao.com

[小琴密語]