文章日期 : 2017年11月1日

幼教今昔展 見木滑梯舊證書

【明報專訊】「有擇食嗎?」、「有午睡嗎?」……呢啲都係N年前一本幼稚園手冊內「學生考勤記錄」列出嘅問題,咁究竟本港半個世紀前嘅幼稚園係咩模樣嘅呢?教育大學香港教育博物館為期一年嘅「香港幼兒教育今昔」展覽,展出多件1950、60年代幼稚園物品,包括木製滑梯、成績表、玩具等,讓公眾一窺或回味當年嘅學生生活面貌。Emily睇到一個懷舊膠水壺,即時覺得好鬼有feel!

有互動遊戲 可自製成績表

展覽分兩個部分,第一部分以兒歌、故事、茶點、學習等為主題;第二部分聚焦幼兒教育發展同幼師培訓。展品包括木製滑梯、蹺蹺板、幼稚園成績表同畢業證書、玩具、教科書、兒歌集,見證香港幼稚園發展嘅珍貴照片等等。公眾仲可以欣賞著名兒歌填詞人鄭國江嘅經典兒歌,現場亦設有互動遊戲,公眾可以為自己製作幼稚園成績表。

本港幼兒教育喺1970年代起急速發展,3至5歲幼童入學比率由1971年55%增加至1981年嘅83%。其實早於1950、60年代,香港已經有幼稚園,但主要由志願團體同私人企業管理,直至1981年,政府先提出較完整嘅幼兒教育發展建議。想了解更多本港幼兒教育發展,可即日起至出年10月31號,星期一至日上晝10點到下晝5點(公眾假期休館),到教大大埔校園D1座平台香港教育博物館欣賞展覽。