文章日期 : 2017年10月25日

空姐變見習機師學員 盼「機尾做到機頭」

【明報專訊】香港航空推出首屆見習機師培訓計劃,早前吸引逾4000人參加,一輪面試後篩選咗10人成為第一屆學員,佢哋下個月會到新西蘭L3 Airline Academy接受為期70周嘅訓練。港航副主席鄧竟成話,港航身為本地航空公司,希望可以訓練更多港人機師,會考慮繼續推出同類計劃。

今年28歲、曾任空姐6年嘅袁恩慈,係10名見習機師學員之一,佢話因為做空姐而更多機會了解飛機,所以佢曾經報讀坊間有關駕駛飛機嘅理論課程,又下咗唔少苦功應付面試,𠵱家好開心可以成為見習機師,仲話希望可以通過考核同實習,咁就可以「由機尾做到機頭」喇!

港航耗資約1600萬港元培訓見習機師,預料第一屆學員通過所有培訓同考核後,最快可於2019年成為第二副機師。鄧竟成話,港航現時約有500名機師,當中約50人係港人,隨着全年客運量預計將達710萬,航空業都需要增加人手應付,港航都要培訓更多人才。