文章日期 : 2017年10月10日

教局請IT兼職 要CS學位教育證書6年中學經驗

【明報專訊】特首林鄭月娥競選時,教育係其中一個佢好關注嘅範疇,政綱提及加強推動STEM嘅教育,研究增加對學校相關資助嘅金額,並盡早將電腦程式編寫(coding)引進學校課程。政府9月底就出招聘廣告,聘請兼職項目經理(編程教育),不過呢個招聘引起唔少IT人熱議,連立法會資訊科技界議員莫乃光都喺facebook批評,「俾個超人你吖?不過都係做散工。香港政府對IT人嘅態度就係咁」。

fb專頁「我不是 I.T. KOL」噚日分享政府有關招聘廣告,當中提到個職位要求需要有計算機科學(CS)學士學位、教育證書,仲要有具備不少於6年喺中學任教或課程發展經驗,其中至少4年有使用Scratch同App Inventor做教學嘅經驗。個post仲寫明最好教過小學,呢個專頁就質疑,中、小學係兩個世界,但招聘要求讀完CS仲要教咗6年中學加小學,「究竟存唔存在呢個人都唔知啦」。

唔接受網上申請

雖然要求多,但原來呢個招聘只係一份為期兩年半嘅兼職工作,每星期做17個鐘,時薪396元。該fb專頁就問,究竟政府係想搵退休定失業嘅教師,定係可以得閒返多份兼職嘅老師。雖然係請IT人,但政府唔接受網上申請,要申請者列印表格出嚟填再郵寄。