文章日期 : 2017年9月22日

師奶變畫家 IFC開畫展

【明報專訊】水彩畫同廣東大戲,家庭主婦同畫家,再唔係大纜都扯唔埋,水彩畫家王碧影(Fanny)係家庭主婦,仔大女大之後,自己有更多時間,於是就去追尋兒時夢想,重拾畫筆,最初開始畫花,10年前拜師專研畫人物,以水彩形式繪畫廣東大戲,仔細描繪花旦嘅造手、表情同服飾等,近日重有機會喺中環國際金融中心一期舉辦畫展,希望以畫作介紹廣東大戲呢個文化畀大眾認識。

Fanny話自小已經喜歡畫畫,細個成日用鉛筆畫老夫子同迪士尼人物送畀朋友,但父母唔想佢讀藝術,於是就去咗讀會計,直到生咗一仔一女後,就轉行做家庭主婦;有一次送個女去學芭蕾,發現自己反正有時間,就報讀水彩畫班,點知一畫就20年,由最初專研畫花,得到老師賞識同參賽,除咗贏到幾個全國畫畫比賽獎項,仲成為香港20個獲邀加入中國美術家協會做成員嘅畫家之一。

後來Fanny因為熱愛粵劇,拜師學習畫人物,自此決定要專心以水彩畫捕捉粵劇老倌台前幕後整裝、演出嘅百種姿態,今次喺中環國際金融中心搞畫展,希望以水彩畫優美嘅筆觸展現粵劇中各式嘅面貌,引起更多人對粵劇嘅興趣。