文章日期 : 2017年9月19日

太陽能九巴 幫車廂降溫

【明報專訊】九巴有無諗過巴士都可以用太陽能發電?九巴噚日向傳媒介紹,話經過4個月研發,成功喺雙層巴士車頂安裝太陽能發電裝置;當巴士停車熄匙,仍可透過太陽能供電驅動通風系統,令車廂保持空氣流通,車廂溫度可以降低5至10度,仲可以為巴士上嘅USB插座供電。九巴話,首部安裝太陽能發電裝置嘅巴士會喺本周內投入服務,行走屯門嘅巴士線。

負責研發嘅九巴工程部工程師盧俊沂話,研發期間九巴喺一部雙層巴士嘅車頂,安裝20塊面積1米乘0.6米嘅太陽能電池板,將車頂吸收到嘅太陽能轉化為電能,驅動通風系統運作;當巴士停車熄匙,太陽能發動嘅通風系統就會將車內嘅熱空氣抽出車外,令車廂溫度降低5至10度;當巴士再開動時,由於車廂入面溫度較低,冷氣系統就可以喺更短時間內令車廂調節至合適溫度,減少因製冷所消耗嘅柴油。

太陽能裝置亦會供電畀車內嘅USB插座,電量會儲存喺備用電池,巴士喺晚間行駛時,備用電池就會供電畀USB插座。九巴話未來會進一步研究將太陽能發電裝置,用喺驅動車廂嘅Wi-Fi裝置度。九巴已經為呢項發明申請專利,等待政府審批。